kaaraNaparacidroopaa kaanceepuraseemni kaamapeeThagataa |
kaacana viharati karuNaa kaaSmeerastabakakOmalaangalataa ||1||
kaMcana kaanceenilayaM karadhRutakOdaNDabaaNasRuNipaaSam |
kaThinastanabharanamraM kaivalyaanandakandamavalambE ||2||
cintitaphalaparipOShaNacintaamaNirEva kaancinilayaa mE |
ciratarasucaritasulabhaa cittaM SiSirayatu citsukhaadhaaraa ||3||
kuTilakacaM kaThinakucaM kundasmitakaanti kunkumacCaayam |
kurutE vihRutiM kaancyaaM kulaparvatasaarvabhaumasarvasvam ||4||
pancaSaraSaastrabOdhanaparamaacaaryENa dRuShTipaatEna |
kaanceeseemni kumaaree kaacana mOhayati kaamajEtaaram ||5||
parayaa kaanceepurayaa parvataparyaayapeenakucabharayaa |
paratantraa vayamanayaa pankajasabrahmacaarilOcanayaa ||6||
aiSvaryamindumaulEraikatmyaprakRuti kaancimadhyagatam |
aindavakiSOraSEkharamaidamparyaM cakaasti nigamaanaam ||7||
SritakampaseemaanaM SithilitaparamaSivadhairyamahimaanam |
kalayE paTalimaanaM kaMcana kancukitabhuvanabhoomaanam ||8||
aadRutakaanceenilayamaadyaamaarooDhayauvanaaTOpaam |
aagamavataMsakalikaamaanandaadvaitakandaleeM vandE ||9||
tungaabhiraamakucabharaSRungaaritamaaSrayaami kaancigatam |
gangaadharaparatantraM SRungaaraadvaitatantrasiddhaantam ||10||
kaanceeratnavibhooShaaM kaamapi kandarpasootikaapaangeem |
paramaaM kalaamupaasE paraSivavaamaankapeeThikaaseenaam ||11||
kampaateecaraaNaaM karuNaakOrakitadRuShTipaataanaam |
kEleevanaM manO mE kEShaaMcidbhavatu cidvilaasaanaam ||12||
aamratarumoolavasatEraadimapuruShasya nayanapeeyooSham |
aarabdhayauvanOtsavamaamnaayarahasyamantaravalambE ||13||
adhikaanci paramayOgibhiraadimaparapeeThaseemni dRuSyEna |
anubaddhaM mama maanasamaruNimasarvasvasampradaayEna ||14||
ankitaSaMkaradEhaamankuritOrOjakankaNaaSlEShaiH |
adhikaanci nityataruNeemadraakShaM kaaMcidadbhutaaM baalaam ||15||
madhuradhanuShaa maheedharajanuShaa nandaami surabhibaaNajuShaa |
cidvapuShaa kaancipurE kElijuShaa bandhujeevakaantimuShaa ||16||
madhurasmitEna ramatE maaMsalakucabhaaramandagamanEna |
madhyEkaanci manO mE manasijasaamraajyagarvabeejEna ||17||
dharaNimayeeM taraNimayeeM pavanamayeeM gaganadahanahOtRumayeem |
ambumayeemindumayeemambaamanukampamaadimaameekShE ||18||
leenasthiti munihRudayE dhyaanastimitaM tapasyadupakampam |
peenastanabharameeDE meenadhvajatantraparamataatparyam ||19||
SvEtaa mantharahasitE Saataa madhyE ca vaaDbhanOteetaa |
Seetaa lOcanapaatE spheetaa kucaseemni SaaSvatee maataa ||20||
purataH kadaa na karavai puravairivimardapulakitaangalataam |
punateeM kaanceedESaM puShpaayudhaveeryasarasaparipaaTeem ||21||
puNyaa kaapi purandhree punkhitakandarpasampadaa vapuShaa |
pulinacaree kampaayaaH puramathanaM pulakaniculitaM kurutE ||22||
tanimaadvaitavalagnaM taruNaaruNasampradaayatanulEkham |
taTaseemani kampaayaastaruNimasarvasvamaadyamadraakSham ||23||
pauShTikakarmavipaakaM pauShpaSaraM savidhaseemni kampaayaaH |
adraakShamaattayauvanamabhyudayaM kaMcidardhaSaSimaulaiH ||24||
saMSritakaanceedESE sarasijadaurbhaagyajaagraduttaMsE |
saMvinmayE vileeyE saarasvatapuruShakaarasaamraajyE ||25||
mOditamadhukaraviSikhaM svaadimasamudaayasaarakOdaNDam |
aadRutakaanceekhElanamaadimamaaruNyabhEdamaakalayE ||26||
urareekRutakaancipureemupaniShadaravindakuharamadhudhaaraam |
unnamrastanakalaSeemutsavalahareemupaasmahE SambhOH ||27||
ENaSiSudeerghalOcanamEnaHparipanthi santataM bhajataam |
EkaamranaathajeevitamEvampadadooramEkamavalambE ||28||
smayamaanamukhaM kaanceebhayamaanaM kamapi dEvataabhEdam |
dayamaanaM veekShya muhurvayamaanandaamRutaambudhau magnaaH ||29||
kutukajuShi kaancidESE kumudatapOraaSipaakaSEkharitE |
kurutE manOvihaaraM kulagiriparibRuDhakulaikamaNideepE ||30||
veekShEmahi kaancipurE vipulastanakalaSagarimaparavaSitam |
vidrumasahacaradEhaM vibhramasamavaayasaarasannaaham ||31||
kuruvindagOtragaatraM koolacaraM kamapi naumi kampaayaaH |
koolaMkaShakucakumbhaM kusumaayudhaveeryasaarasaMrambham ||32||
kuDoomalitakucakiSOraiH kurvaaNaiH kaancidESasauhaardam |
kunkumaSONairnicitaM kuSalapathaM SambhusukRutasambhaaraiH ||33||
ankitakacEna kEnacidandhaMkaraNauShadhEna kamalaanaam |
antaHpurENa SambhOralaMkriyaa kaapi kalpyatE kaancyaam ||34||
ooreekarOmi santatamooShmalaphaalEna lalitaM puMsaa |
upakampamucitakhElanamurveedharavaMSasampadunmESham ||35||
ankuritastanakOrakamankaalaMkaaramEkacootapatEH |
aalOkEmahi kOmalamaagamasaMlaapasaarayaathaarthyam ||36||
punjitakaruNamudancitaSinjitamaNikaanci kimapi kaancipurE |
manjaritamRudulahaasaM pinjaratanuruci pinaakimooladhanam ||37||
lOlahRudayOsti SambhOrlOcanayugalEna lEhyamaanaayaam |
lalitaparamaSivaayaaM laavaNyaamRutatarangamaalaayaam ||38||
madhukarasahacaracikurairmadanaagamasamayadeekShitakaTaakShaiH |
maNDitakampaateerairmangalakandairmamaastu saaroopyam ||39||
vadanaaravindavakShOvaamaankataTeevaSaMvadeebhootaa |
pooruShatritayE trEdhaa purandhriroopaa tvamEva kaamaakShi ||40||
baadhaakareeM bhavaabdhEraadhaaraadyambujEShu vicaranteem |
aadhaareekRutakaancee bOdhaamRutaveecimEva vimRuSaamaH ||41||
kalayaamyantaH SaSadharakalayaankitamaulimamalacidvalayaam |
alayaamaagamapeeTheenilayaaM valayaankasundareemambaam ||42||
Sarvaadiparamasaadhakagurvaaneetaaya kaamapeeThajuShE |
sarvaakRutayE SONimagarvaayaasmai samarpyatE hRudayam ||43||
samayaa saandhyamayookhaiH samayaa buddhayaa sadaiva Seelitayaa |
umayaa kaanceeratayaa na mayaa labhyatE kiM nu taadaatmyam ||44||
jantOstava padapoojanasantOShatarangitasya kaamaakShi |
vandhO yadi bhavati punaH sindhOrambhassu bambhrameeti Silaa ||45||
kuNDali kumaari kuTilE caNDi caraacarasavitri caamuNDE |
guNini guhaariNi guhyE gurumoortE tvaaM namaami kaamaakShi ||46||
abhidaakRutirbhidaakRutiracidaakRutirapi cidaakRutirmaataH |
anahantaa tvamahantaa bhramayasi kaamaakShi SaaSvatee viSvam ||47||
Siva Siva paSyanti samaM SreekaamaakSheekaTaakShitaaH puruShaaH |
vipinaM bhavanamamitraM mitraM lOShTaM ca yuvatibimbOShTham ||48||
kaamaparipanthikaamini kaamESvari kaamapeeThamadhyagatE |
kaamadughaa bhava kamalE kaamakalE kaamakOTi kaamaakShi ||49||
madhyEhRudayaM madhyEniTilaM madhyESirOpi vaastavyaam |
caNDakaraSakrakaarmukacandrasamaabhaaM namaami kaamaakSheem ||50||
adhikaanci kElilOlairakhilaagamayantratantramayaiH |
atiSeetaM mama maanasamasamaSaradrOhijeevanOpaayaiH ||51||
nandati mama hRudi kaacana mandirayantaa nirantaraM kaanceem |
induravimaNDalakucaa binduviyannaadapariNataa taruNee ||52||
SampaalataasavarNaM sampaadayituM bhavajvaracikitsaam |
limpaami manasi kiMcana kampaataTarOhi siddhabhaiShajyam ||53||
anumitakucakaaThinyaamadhivakShaHpeeThamangajanmaripOH |
aanandadaaM bhajE taamaanangabrahmatatvabOdhasiraam ||54||
aikShiShi paaSaankuSadharahastaantaM vismayaarhavRuttaantam |
adhikaanci nigamavaacaaM siddhaantaM SoolapaaNiSuddhaantam ||55||
aahitavilaasabhangeemaabrahmastambaSilpakalpanayaa |
aaSritakaanceematulaamaadyaaM visphoortimaadriyE vidyaam ||56||
mookOpi jaTiladurgatiSOkOpi smarati yaH kShaNaM bhavateem |
EkO bhavati sa janturlOkOttarakeertirEva kaamaakShi ||57||
pancadaSavarNaroopaM kaMcana kaanceevihaaradhaurEyam |
pancaSareeyaM SambhOrvancanavaidagdhyamoolamavalambE ||58||
pariNatimateeM caturdhaa padaveeM sudhiyaaM samEtya sauShumneem |
pancaaSadarNakalpitamadaSilpaaM tvaaM namaami kaamaakShi ||59||
aadikShanmama gururaaDaadikShaantaakSharaatmikaaM vidyaam |
svaadiShThacaapadaNDaaM nEdiShThaamEva kaamapeeThagataam ||60||
tuShyaami harShitasmaraSaasanayaa kaancipurakRutaasanayaa |
svaasanayaa sakalajagadbhaasanayaa kalitaSambaraasanayaa ||61||
prEmavatee kampaayaaM sthEmavatee yatimanassu bhoomavatee |
saamavatee nityagiraa sOmavatee Sirasi bhaati haimavatee ||62||
kautukinaa kampaayaaM kausumacaapEna keelitEnaantaH |
kuladaivatEna mahataa kuDmalamudraaM dhunOtu naHpratibhaa ||63||
yoonaa kEnaapi miladdEhaa svaahaasahaayatilakEna |
sahakaaramooladESE saMvidroopaa kuTumbinee ramatE ||64||
kusumaSaragarvasampatkOSagRuhaM bhaati kaancidESagatam |
sthaapitamasminkathamapi gOpitamantarmayaa manOratnam ||65||
dagdhaShaDadhvaaraNyaM daradalitakusumbhasambhRutaaruNyam |
kalayE navataaruNyaM kampaataTaseemni kimapi kaaruNyam ||66||
adhikaanci vardhamaanaamatulaaM karavaaNi paaraNaamakShNOH |
aanandapaakabhEdaamaruNimapariNaamagarvapallavitaam ||67||
baaNasRuNipaaSakaarmukapaaNimamuM kamapi kaamapeeThagatam |
ENadharakONacooDaM SONimaparipaakabhEdamaakalayE ||68||
kiM vaa phalati mamaanyaurbimbaadharacumbimandahaasamukhee |
sambaadhakaree tamasaamambaa jaagarti manasi kaamaakShee ||69||
mancE sadaaSivamayE pariSivamayalalitapauShpaparyankE |
adhicakramadhyamaastE kaamaakShee naama kimapi mama bhaagyam ||70||
rakShyOsmi kaamapeeTheelaasikayaa ghanakRupaamburaaSikayaa |
SrutiyuvatikuntaleemaNimaalikayaa tuhinaSailabaalikayaa ||71||
leeyE puraharajaayE maayE tava taruNapallavacCaayE |
caraNE candraabharaNE kaanceeSaraNE nataartisaMharaNE ||72||
moortimati muktibeejE moordhni stabakitacakOrasaamraajyE |
mOditakampaakoolE muhurmuhurmanasi mumudiShaasmaakam ||73||
vEdamayeeM naadamayeeM bindumayeeM parapadOdyadindumayeem |
mantramayeeM tantramayeeM prakRutimayeeM naumi viSvavikRutimayeem ||74||
puramathanapuNyakOTee punjitakavilOkasooktirasadhaaTee |
manasi mama kaamakOTee viharatu karuNaavipaakaparipaaTee ||75||
kuTilaM caTulaM pRuthulaM mRudulaM kacanayanajaghanacaraNEShu |
avalOkitamavalambitamadhikampaataTamamEyamasmaabhiH ||76||
pratyanmukhyaa dRuShTayaa prasaadadeepaankurENa kaamaakShyaaH |
paSyaami nistulamahO pacElimaM kamapi paraSivOllaasam ||77||
vidyE vidhaatRuviShayE kaatyaayani kaali kaamakOTikalE |
bhaarati bhairavi bhadrE Saakini Saambhavi SivE stuvE bhavateem ||78||
maalini mahESacaalini kaanceekhElini vipakShakaalini tE |
Soolini vidrumaSaalini surajanapaalini kapaalini namOstu ||79||
dESika iti kiM SaMkE tattaadRuktava nu taruNimOnmEShaH |
kaamaakShi SoolapaaNEH kaamaagamasamayadeekShaayaam ||80||
vEtaNDakumbhaDambaravaitaNDikakucabharaartamadhyaaya |
kunkumarucE namasyaaM SaMkaranayanaamRutaaya racayaamaH ||81||
adhikaancitamaNikaancanakaanceemadhikaanci kaaMcidadraakSham |
avanatajanaanukampaamanukampaakoolamasmadanukoolaam ||82||
paricitakampaateeraM parvataraajanyasukRutasannaaham |
paragurukRupayaa veekShE paramaSivOtsangamangalaabharaNam ||83||
dagdhamadanasya SambhOH pratheeyaseeM brahmacaryavaidagdheem |
tava dEvi taruNimaSreecaturimapaakO na cakShamE maataH ||84||
madajalatamaalapatraa vasanitapatraa karaadRutakhaanitraa |
viharati pulindayOShaa gunjaabhooShaa phaNeendrakRutavEShaa ||85||
ankE Sukinee geetE kautukinee parisarE ca gaayakinee |
jayasi savidhEmba bhairavamaNDalinee Sravasi SankhakunDalinee ||86||
praNatajanataapavargaa kRutabahusargaa sasiMhasaMsargaa |
kaamaakShi muditabhargaa hataripuvargaa tvamEva saa durgaa ||87||
SravaNacaladvEtaNDaa samarOddaNDaa dhutaasuraSikhaNDaa |
dEvi kalitaantraShaNDaa dhRutanaramuNDaa tvamEva caamuNDaa ||88||
urveedharEndrakanyE darveebharitEna bhaktapoorENa |
gurveemakiMcanaarti kharveekuruShE tvamEva kaamaakShi ||89||
taaDitaripuparipeeDanabhayaharaNa nipuNahalamusalaa |
krODapatibheeShaNamukhee kreeDasi jagati tvamEva kaamaakShi ||90||
smaramathanavaraNalOlaa manmathahElaavilaasamaNiSaalaa |
kanakarucicauryaSeelaa tvamamba baalaa karaabjadhRutamaalaa ||91||
vimalapaTee kamalakuTee pustakarudraakShaSastahastapuTee |
kaamaakShi pakShmalaakShee kalitavipancee vibhaasi vairincee ||92||
kunkumarucipingamasRukpankilamuNDaalimaNDitaM maataH |
SreekaamaakShi tadeeyasangamakalaamandeebhavatkautukaH
jayati tava roopadhEyaM japapaTapustakavaraabhayakaraabjam ||93||
kanakamaNikalitabhooShaaM kaalaayasakalahaSeelakaantikalaam |
kaamaakShi SeelayE tvaaM kapaalaSoolaabhiraamakarakamalaam ||94||
lOhitimapunjamadhyE mOhitabhuvanE mudaa nireekShantE |
vadanaM tava kuvayugalaM kaanceeseemaaM ca kEpi kaamaakShi ||95||
jaladhidviguNitahutabahadiSaadinESvarakalaaSvinEyadalaiH |
nalinairmahESi gacCasi sarvOttarakarakamaladalamamalam ||96||
satkRutadESikacaraNaaH sabeejanirbeejayOganiSrENyaa |
apavargasaudhavalabheemaarOhantyamba kEpi tava kRupayaa ||97||
antarapi bahirapi tvaM jantutatErantakaantakRudahantE |
cintitasantaanavataaM santatamapi tantaneeShi mahimaanam ||98||
kalamanjulavaaganumitagalapanjaragataSukagrahautkaNThyaat |
amba radanaambaraM tE bimbaphalaM SambaraariNaa nyastam ||99||
jaya jaya jagadamba SivE jaya jaya kaamaakShi jaya jayaadrisutE |
jaya jaya mahESadayitE jaya jaya cidgaganakaumudeedhaarE ||100||
aaryaaSatakaM bhaktyaa paThataamaaryaakaTaakShENa |
nissarati vadanakamalaadvaaNee peeyooShadhOraNee divyaa ||101||
|| iti aaryaaSatakaM sampoorNam ||