mahimnaH panthaanaM madanaparipanthipraNayini
prabhurnirNEtuM tE bhavati yatamaanOpi katamaH |
tathaapi SreekaanceevihRutirasikE kOpi manasO
vipaakastvatpaadastutividhiShu jalpaakayati maam ||1||
galagraahee paurandarapuravaneepallavarucaaM
dhRutapaathamyaanaamaruNamahasaamaadimaguruH |
samindhE bandhookastabakasahayudhvaa diSi diSi
prasarpankaamaakShyaaScaraNakiraNaanaamaruNimaa ||2||
maraaleenaaM yaanaabhyasanakalanaamoolaguravE
daridraaNaaM traaNavyatikarasurOdyaanataravE |
tamaskaaNDaprauDhiprakaTanatiraskaarapaTavE
janOyaM kaamaakShyaaScaraNanalinaaya spRuhayatE ||3||
vahantee saindooreeM saraNimavanamraamarapurxee-
purandhreeseemantE kavikamalabaalaarkasuShamaa |
trayeeseemantinyaaH stanataTanicOlaaruNapaTee
vibhaantee kaamaakShyaaH padanalinakaantirvijayatE ||4||
praNamreebhootasya praNayakalahatrastamanasaH
smaraaraatEScooDaaviyati gRuhamEdhee himakaraH |
yayOH saandhyaaM kaantiM vahati suShamaabhiScaraNayOH
tayOrmE kaamaakShyaa hRudayamapatandraM viharataam ||5||
yayOH peeThaayantE vibudhamukuTeenaaM paTalikaa
yayOH saudhaayantE svayamudayabhaajO bhaNitayaH |
yayOH daasaayantE sarasijabhavaadyaaScaraNayOH
tayOrmE kaamaakShyaa dinamanu vareevartu hRudayam ||6||
nayantee saMkOcaM sarasijarucaM dikparisarE
sRujantee lauhityaM nakhakiraNacandraardhakhacitaa |
kaveendraaNaaM hRutkairavavikasanOdyOgajananee
sphurantee kaamaakShyaaH caraNarucisandhyaa vijayatE ||7||
viraavairmaanjeeraiH kimapi kathayanteeva madhuraM
purastaadaanamrE puravijayini smEravadanE |
vayasyEva prauDhaa Sithilayati yaa prEmakalaha-
prarOhaM kaamaakShyaaH caraNayugalee saa vijayatE ||8||
suparvastreelOlaalakaparicitaM ShaTpadakulaiH
sphurallaakShaaraagaM taruNataraNijyOtiraruNaiH |
bhRutaM kaantyambhObhiH visRumaramarandaiH sarasijaiH
vidhattE kaamaakShyaaH caraNayugalaM bandhupadaveem ||9||
rajaHsaMsargEpi sthitamarajasaamEva hRudayE
paraM raktatvEna sthitamapi viraktaikaSaraNam |
alabhyaM mandaanaaM dadhadapi sadaa mandagatitaaM
vidhattE kaamaakShyaaH caraNayugamaaScaryalahareem ||10||
jaTaalaa manjeerasphuradaruNaratnaaMSunikaraiH
niShidantee madhyE nakharucijhareegaangapayasaam |
jagattraaNaM kartuM janani mama kaamaakShi niyataM
tapaScaryaaM dhattE tava caraNapaathOjayugalee ||11||
tulaakOTidvandvakkaNitabhaNitaabheetivacasOH
vinamraM kaamaakShee visRumaramahaHpaaTalitayOH |
kShaNaM vinyaasEna kShapitatamasOrmE lalitayOH
puneeyaanmoordhaanaM puraharapurandhree caraNayOH ||12||
bhavaani druhyEtaaM bhavanibiDitEbhyO mama muhu-
stamOvyaamOhEbhyastava janani kaamaakShi caraNau |
yayOrlaakShaabindusphuraNadharaNaaddhvarjaTijaTaa-
kuTeeraa SONaankaM vahati vapurENaankakalikaa ||13||
pavitreekuryurnuH padatalabhuvaH paaTalarucaH
paraagaastE paapapraSamanadhureeNaaH paraSivE |
kaNaM labdhuM yEShaaM nijaSirasi kaamaakShi vivaSaa
valantO vyaatanvantyahamahamikaaM maadhavamukhaaH ||14||
balaakaamaalaabhirnakharucimayeebhiH parivRutE
vinamrasvarnaareevikacakacakaalaambudakulE |
sphurantaH kaamaakShi sphuTadalitabandhookasuhRuda-
staTillEkhaayantE tava caraNapaathOjakiraNaaH ||15||
saraagaH sadvEShaH prasRumarasarOjE pratidinaM
nisargaadaakraamanvibudhajanamoordhaanamadhikam |
kathaMkaaraM maataH kathaya padapadmastava sataaM
nataanaaM kaamaakShi prakaTayati kaivalyasaraNim ||16||
japaalakShmeeSONO janitaparamagnyaananalinee-
vikaasavyaasangO viphalitajagajjaaDyagarimaa |
manaHpoorvaadriM mE tilakayatu kaamaakShi tarasaa
tamaskaaNDadrOhee tava caraNapaathOjaramaNaH ||17||
namaskurmaH prEnkhanmaNikaTakaneelOtpalamahaH-
payOdhau rinkhadbhirnakhakiraNaphEnairdhavalitE |
sphuTaM kurvaaNaaya prabalacaladaurvaanalaSikhaa-
vitarkaM kaamaakShyaaH satatamaruNimnE caraNayOH ||18||
SivE paaSaayEtaamalaghuni tamaHkoopakuharE
dinaadheeSaayEtaaM mama hRudayapaathOjavipinE |
nabhOmaasaayEtaaM sarasakavitaareetisariti
tvadeeyau kaamaakShi prasRutakiraNau dEvi caraNau ||19||
niShaktaM SrutyantE nayanamiva sadvRuttaruciraiH
samairjuShTaM Suddhairadharamiva ramyairdvijagaNaiH |
SivE vakShOjanmadvitayamiva muktaaSritamumE
tvadeeyaM kaamaakShi praNataSaraNaM naumi caraNam ||20||
namasyaasaMsajjannamuciparipanthipraNayinee-
nisargaprEnkhOlatkuralakulakaalaahiSabalE |
nakhacCaayaadugdhOdadhipayasi tE vaidrumarucaaM
pracaaraM kaamaakShi pracurayati paadaabjasuShamaa ||21||
kadaa dooreekartuM kaTuduritakaakOlajanitaM
mahaantaM santaapaM madanaparipanthipriyatamE |
kShaNaattE kaamaakShi tribhuvanapareetaapaharaNE
paTeeyaaMsaM lapsyE padakamalasEvaamRutarasam ||22||
yayOH saandhyaM rOciH satatamaruNimnE spRuhayatE
yayOScaandree kaantiH paripatati dRuShTvaa nakharucim |
yayOH paakOdrEkaM pipaThiShati bhaktyaa kisalayaM
mradimnaH kaamaakShyaa manasi caraNau tau tanumahE ||23||
jagannEdaM nEdaM paramiti parityajya yatibhiH
kuSaagreeyasvaantaiH kuSaladhiShaNaiH SaastrasaraNau |
gavEShyaM kaamaakShi dhruvamakRutakaanaaM girisutE
giraamaidamparyaM tava caraNapadmaM vijayatE ||24||
kRutasnaanaM SaastraamRutasarasi kaamaakShi nitaraaM
dadhaanaM vaiSadyaM kalitarasamaanandasudhayaa |
alaMkaaraM bhoomErmunijanamanaScinmayamahaa-
payOdhErantassthaM tava caraNaratnaM mRugayatE ||25||
manOgEhE mOhOdbhavatimirapoorNE mama muhuH
daridraaNeekurvandinakarasahasraaNi kiraNaiH |
vidhattaaM kaamaakShi prasRumaratamOvancanacaNaH
kShaNaardhaM saannidhyaM caraNamaNideepO janani tE ||26||
kaveenaaM cEtOvannakhararucisamparki vibudha-
sravanteesrOtOvatpaTumukharitaM haMsakaravaiH |
dinaarambhaSreevanniyatamaruNacCaayasubhagaM
madantaH kaamaakShyaaH sphuratu padapankEruhayugam ||27||
sadaa kiM samparkaatprakRutikaThinairnaakimukuTaiH
taTairneehaaraadrEradhikamaNunaa yOgimanasaa |
vibhintE saMmOhaM SiSirayati bhaktaanapi dRuSaam
adRuSyaM kaamaakShi prakaTayati tE paadayugalam ||28||
pavitraabhyaamamba prakRutimRudulaabhyaaM tava SivE
padaabhyaaM kaamaakShi prasabhamabhibhootaiH sacakitaiH |
pravaalairambhOjairapi ca vanavaasavratadaSaaH
sadaivaarabhyantE paricaritanaanaadvijagaNaiH ||29||
ciraaddRuSyaa haMsaiH kathamapi sadaa haMsasulabhaM
nirasyantee jaaDyaM niyatajaDamadhyaikaSaraNam |
adOShavyaasangaa satatamapi dOShaaptimalinaM
payOjaM kaamaakShyaaH parihasati paadaabjayugalee ||30||
suraaNaamaanandaprabalanatayaa maNDanatayaa
nakhEndujyOtsnaabhirvisRumaratamaHkhaNDanatayaa |
payOjaSreedvEShavrataratatayaa tvaccaraNayOH
vilaasaH kaamaakShi prakaTayati naiSaakaradaSaam ||31||
sitimnaa kaanteenaaM nakharajanuShaaM paadanalina-
cCaveenaaM SONimnaa tava janani kaamaakShi namanE |
labhantE mandaaragrathitanavabandhookakusuma-
srajaaM saameeceenyaM surapurapurandhreekacabharaaH ||32||
sphuranmadhyE SuddhE nakhakiraNadugdhaabdhipayasaaM
vahannabjaM cakraM daramapi ca lEkhaatmakatayaa |
SritO maatsyaM roopaM Sriyamapi dadhaanO nirupamaaM
tridhaamaa kaamaakShyaaH padanalinanaamaa vijayatE ||33||
nakhaSreesannaddhastabakanicitaH svaiSca kiraNaiH
piSangaiH kaamaakShi prakaTitalasatpallavaruciH |
sataaM gamyaH SankE sakalaphaladaataa surataruH
tvadeeyaH paadOyaM tuhinagiriraajanyatanayE ||34||
vaShaTkurvanmaanjeerakalakalaiH karmalaharee-
haveeMShi prauddaNDaM jvalati paramagnyaanadahanE |
maheeyaankaamaakShi sphuTamahasi jOhOti sudhiyaaM
manOvEdyaaM maatastava caraNayajvaa girisutE ||35||
mahaamantraM kiMcinmaNikaTakanaadairmRudu japan
kShipandikShu svacCaM nakharucimayaM bhaasmanarajaH |
nataanaaM kaamaakShi prakRutipaTuraccaaTya mamataa-
piSaaceeM paadOyaM prakaTayati tE maantrikadaSaam ||36||
udeetE bOdhEndau tamasi nitaraaM jagmuShi daSaaM
daridraaM kaamaakShi prakaTamanuraagaM vidadhatee |
sitEnaacCaadyaangaM nakharucipaTEnaanghriyugalee-
purandhree tE maataH svayamabhisaratyEva hRudayam ||37||
dinaarambhaH sampannalinavipinaanaamabhinavO
vikaasO vaasantaH sukavipikalOkasya niyataH |
pradOShaH kaamaakShi prakaTaparamagnyaanaSaSina-
Scakaasti tvatpaadasmaraNamahimaa SailatanayE ||38||
dhRutacCaayaM nityaM sarasiruhamaitreeparicitaM
nidhaanaM deepteenaaM nikhilajagataaM bOdhajanakam |
mumukShooNaaM maargaprathanapaTu kaamaakShi padaveeM
padaM tE paatangeeM parikalayatE parvatasutE ||39||
Sanaisteertvaa mOhaambudhimatha samaarODhumanasaH
kramaatkaivalyaakhyaaM sukRutisulabhaaM saudhavalabheem |
labhantE niHSrENeemiva jhaTiti kaamaakShi caraNaM
puraScaryaabhistE puramathanaseemantini janaaH ||40||
pracaNDaartikShObhapramathanakRutE praatibhasari-
tpravaahaprOddaNDeekaraNajaladaaya praNamataam |
pradeepaaya prauDhE bhavatamasi kaamaakShi caraNa-
prasaadaunmukhyaaya spRuhayati janOyaM janani tE ||41||
marudbhiH saMsEvyaa satatamapi caancalyarahitaa
sadaaruNyaM yaantee pariNatidaridraaNasuShamaa |
guNOtkarShaanmaanjeerakakalakalaistarjanapaTuH
pravaalaM kaamaakShyaaH parihasati paadaabjayugalee ||42||
jagadrakShaadakShaa jalajaruciSikShaapaTutaraa
samairnamyaa ramyaa satatamabhigamyaa budhajanaiH |
dvayee leelaalOlaa SrutiShu surapaalaadimukuTee-
taTeeseemaadhaamaa tava janani kaamaakShi padayOH ||43||
giraaM doorau cOrau jaDimatimiraaNaaM kRutajaga-
tparitraaNau SONau munihRudayaleelaikanipuNau |
nakhaiH smErau saarau nigamavacasaaM khaNDitabhava-
grahOnmaadau paadau tava janani kaamaakShi kalayE ||44||
aviSraantaM pankaM yadapi kalayanyaavakamayaM
nirasyankaamaakShi praNamanajuShaaM pankamakhilam |
tulaakOTidvandaM dadhadapi ca gacCannatulataaM
giraaM maargaM paadO girivarasutE langhayati tE ||45||
pravaalaM savreelaM vipinavivarE vEpayati yaa
sphuralleelaM baalaatapamadhikabaalaM vadati yaa |
ruciM saandhyaaM vandhyaaM viracayati yaa vardhayatu saa
SivaM mE kaamaakShyaaH padanalinapaaTalyalaharee ||46||
kiranjyOtsnaareetiM nakhamukharucaa haMsamanasaaM
vitanvaanaH preetiM vikacataruNaambhOruharuciH |
prakaaSaH Sreepaadastava janani kaamaakShi tanutE
SaratkaalaprauDhiM SaSiSakalacooDapriyatamE ||47||
nakhaankoorasmEradyutivimalagangaambhasi sukhaM
kRutasnaanaM gnyaanaamRutamamalamaasvaadya niyatam |
udancanmanjeerasphuraNamaNideepE mama manO
manOgnyE kaamaakShyaaScaraNamaNiharmyE viharataam ||48||
bhavaambhOdhau naukaaM jaDimavipinE paavakaSikhaa-
mamartyEndraadeenaamadhimukuTamuttaMsakalikaam |
jagattaapE jyOtsnaamakRutakavacaHpanjarapuTE
SukastreeM kaamaakShyaa manasi kalayE paadayugaleem ||49||
paratmapraakaaSyapratiphalanacuncuH praNamataaM
manOgnyastvatpaadO maNimukuramudraaM kalayatE |
yadeeyaaM kaamaakShi prakRutimasRuNaaH SOdhakadaSaaM
vidhaatuM cEShThantE balaripuvadhooTeekacabharaaH ||50||
aviSraantaM tiShThannakRutakavacaHkandarapuTee-
kuTeeraantaH prauDhaM nakharucisaTaaleeM prakaTayan |
pracaNDaM khaNDatvaM nayatu mama kaamaakShi tarasaa
tamOvEtaNDEndraM tava caraNakaNTheeravapatiH ||51||
purastaatkaamaakShi pracurarasamaakhaNDalapuree-
purandhreeNaaM laasyaM tava lalitamaalOkya SanakaiH |
nakhaSreebhiH smEraa bahu vitanutE noopuraravai-
ScamatkRutyaa SankE caraNayugalee caaTuracanaaH ||52||
sarOjaM nindantee nakhakiraNakarpooraSiSiraa
niShiktaa maaraarErmukuTaSaSirEkhaahimajalaiH |
sphurantee kaamaakShi sphuTarucimayE pallavacayE
tavaadhattE maitreeM pathikasudRuSaa paadayugalee ||53||
nataanaaM sampattEranavaratamaakarShaNajapaH
prarOhatsaMsaaraprasaragarimastambhanajapaH |
tvadeeyaH kaamaakShi smaraharamanOmOhanajapaH
paTeeyaannaH paayaatpadanalinamanjeeraninadaH ||54||
vitanveethaa naathE mama Sirasi kaamaakShi kRupayaa
padaambhOjanyaasaM paSuparibRuDhapraaNadayitE |
pibantO yanmudraaM prakaTamupakampaaparisaraM
dRuSaa naanandyantE nalinabhavanaaraayaNamukhaaH ||55||
praNaamOdyadbRundaaramukuTamandaarakalikaa-
vilOlallOlambaprakaramayadhoomapracurimaa |
pradeeptaH paadaabjadyutivitatipaaTalyalaharee-
kRuSaanuH kaamaakShyaa mama dahatu saMsaaravipinam ||56||
valakShaSreerRukShaadhipaSiSusadRukShaistava nakhaiH
jighRukShurdakShatvaM sarasiruhabhikShutvakaraNE |
kShaNaanmE kaamaakShi kShapitabhavasaMkShObhagarimaa
vacOvaicakShanyaM caraNayugalee pakShmalayataat ||57||
samantaatkaamaakShi kShatatimirasantaanasubhagaan
anantaabhirbhaabhirdinamanu digantaanviracayan |
ahantaayaa hantaa mama jaDimadantaavalahariH
vibhintaaM santaapaM tava caraNacintaamaNirasau ||58||
dadhaanO bhaasvattaamamRutanilayO lOhitavapuH
vinamraaNaaM saumyO gururapi kavitvaM ca kalayan |
gatau mandO gangaadharamahiShi kaamaakShi bhajataaM
tamaHkEturmaatastava caraNapadmO vijayatE ||59||
nayanteeM daasatvaM nalinabhavamukhyaanasulabha-
pradaanaaddeenaanaamamaratarudaurbhaagyajananeem |
jagajjanmakShEmakShayavidhiShu kaamaakShi padayO-
rdhureeNaameeShTE karastava bhaNitumaahOpuruShikaam ||60||
janOyaM santaptO janani bhavacaNDaaMSukiraNaiH
alabdhavaikaM SeetaM kaNamapi paragnyaanapayasaH |
tamOmaargE paanthastava jhaTiti kaamaakShi SiSiraaM
padaambhOjacCaayaaM paramaSivajaayE mRugayatE ||61||
jayatyamba SreemannakhakiraNaceenaaMSukamayaM
vitaanaM bibhraaNE suramukuTasaMghaTTamasRuNE |
nijaaruNyakShaumaastaraNavati kaamaakShi sulabhaa
budhaiH saMvinnaaree tava caraNamaaNikyabhavanE ||62||
prateemaH kaamaakShi sphuritataruNaadityakiraNa-
SriyO mooladravyaM tava caraNamadreendratanayE |
surEndraaSaamaapoorayati yadasau dhvaantamakhilaM
dhuneetE digbhaagaanapi ca mahasaa paaTalayatE ||63||
mahaabhaaShyavyaakhyaapaTuSayanamaarOpayati vaa
smaravyaapaarErShyaapiSunaniTilaM kaarayati vaa |
dvirEphaaNaamadhyaasayati satataM vaadhivasatiM
praNamraankaamaakShyaaH padanalinamaahaatmyagarimaa ||64||
vivEkaambhassrOtassnapanaparipaaTeeSiSiritE
sameebhootE SaastrasmaraNahalasaMkarShaNavaSaat |
sataaM cEtaHkShEtrE vapati tava kaamaakShi caraNO
mahaasaMvitsasyaprakaravarabeejaM girisutE ||65||
dadhaanO mandaarastabakaparipaaTeeM nakharucaa
vahandeeptaaM SONaangulipaTalacaampEyakalikaam |
aSOkOllaasaM naH pracurayatu kaamaakShi caraNO
vikaasee vaasantaH samaya iva tE SarvadayitE ||66||
nakhaaMSupraacuryaprasRumaramaraalaalidhavalaH
sphuranmanjeerOdyanmarakatamahaSSaivalayutaH |
bhavatyaaH kaamaakShi sphuTacaraNapaaTalyakapaTO
nadaH SONaabhikhyO nagapatitanoojE vijayatE ||67||
dhunaanaM pankaughaM paramasulabhaM kaNTakakulaiH
vikaasavyaasangaM vidadhadaparaadheenamaniSam |
nakhEndujyOtsnaabhirviSadaruci kaamaakShi nitaraam
asaamaanyaM manyE sarasijamidaM tE padayugam ||68||
kareendraaya druhyatyalasagatileelaasu vimalaiH
payOjairmaatsaryaM prakaTayati kaamaM kalayatE |
padaambhOjadvandvaM tava tadapi kaamaakShi hRudayaM
muneenaaM SaantaanaaM kathamaniSamasmai spRuhayatE ||69||
nirastaa SONimnaa caraNakiraNaanaaM tava SivE
samindhaanaa sandhyaaruciracalaraajanyatanayE |
asaamarthyaadEnaM paribhavitumEtatsamarucaaM
sarOjaanaaM jaanE mukulayati SObhaaM pratidinam ||70||
upaadikShaddaakShyaM tava caraNanaamaa gururasau
maraalaanaaM SankE masRuNagatilaalityasaraNau |
atastE nistandraM niyatamamunaa sakhyapadaveeM
prapannaM paathOjaM prati dadhati kaamaakShi kutukam ||71||
dadhaanaiH saMsargaM prakRutimalinaiH ShaTpadakulaiH
dvijaadheeSaSlaaghaavidhiShu vidadhadbhirmukulataam |
rajOmiSraiH padmairniyatamapi kaamaakShi padayOH
virOdhastE yuktO viShamaSaravairipriyatamE ||72||
kavitvaSreemiSreekaraNanipuNau rakShaNacaNau
vipannaanaaM SreemannalinamasRuNau SONakiraNau |
muneendraaNaamantaHkaraNaSaraNau mandasaraNau
manOgnyau kaamaakShyaa duritaharaNau naumi caraNau ||73||
parasmaatsarvasmaadapi ca parayOrmuktikarayOH
nakhaSreebhirjyOtsnaakalitatulayOstaamratalayOH |
nileeyE kaamaakShyaa nigamanutayOrnaakinatayOH
nirastaprOnmeelannalinamadayOrEva padayOH ||74||
svabhaavaadanyOnyaM kisalayamapeedaM tava padaM
mradimnaa SONimnaa bhagavati dadhaatE sadRuSataam |
vanE poorvasyEcCaa satatamavanE kiM tu jagataaM
parasyEtthaM bhEdaH sphurati hRudi kaamaakShi sudhiyaam ||75||
kathaM vaacaalOpi prakaTamaNimanjeeraninadaiH
sadaivaanandaardraanviracayati vaacaMyamajanaan |
prakRutyaa tE SONacCavirapi ca kaamaakShi caraNO
maneeShaanairmalyaM kathamiva nRuNaaM maaMsalayatE ||76||
calattRuShNaaveeceeparicalanaparyaakulatayaa
muhurbhraantastaantaH paramaSivavaamaakShi paravaan |
titeerShuH kaamaakShi pracuratarakarmaambudhimamuM
kadaahaM lapsyE tE caraNamaNisEtuM girisutE ||77||
viSuShyantyaaM pragnyaasariti duritagreeShmasamaya-
prabhaavENa kSheeNE sati mama manaHkEkini Sucaa |
tvadeeyaH kaamaakShi sphuritacaraNaambhOdamahimaa
nabhOmaasaaTOpaM nagapatisutE kiM na kurutE ||78||
vinamraaNaaM cEtObhavanavalabheeseemni caraNa-
pradeepE praakaaSyaM dadhati tava nirdhootatamasi |
aseemaa kaamaakShi svayamalaghuduShkarmalaharee
vighoorNantee SaantiM SalabhaparipaaTeeva bhajatE ||79||
viraajantee SuktirnakhakiraNamuktaamaNitatEH
vipatpaathOraaSau tarirapi naraaNaaM praNamataam |
tvadeeyaH kaamaakShi dhruvamalaghuvahnirbhavavanE
muneenaaM gnyaanaagnEraraNirayamanghirvijayatE ||80||
samastaiH saMsEvyaH satatamapi kaamaakShi vibudhaiH
stutO gandharvastreesulalitavipanceekalaravaiH |
bhavatyaa bhindaanO bhavagirikulaM jRumbhitatamO-
baladrOhee maataScaraNapuruhootO vijayatE ||81||
vasantaM bhaktaanaamapi manasi nityaM parilasad-
ghanacCaayaapoorNaM Sucimapi nRuNaaM taapaSamanam |
nakhEndujyOtsnaabhiH SiSiramapi padmOdayakaraM
namaamaH kaamaakShyaaScaraNamadhikaaScaryakaraNam ||82||
kaveendraaNaaM naanaabhaNitiguNacitreekRutavacaH-
prapancavyaapaaraprakaTanakalaakauSalanidhiH |
adhaHkurvannabjaM sanakabhRugumukhyairmunijanaiH
namasyaH kaamaakShyaaScaraNaparamEShThee vijayatE ||83||
bhavatyaaH kaamaakShi sphuritapadapankEruhabhuvaaM
paraagaaNaaM pooraiH parihRutakalankavyatikaraiH |
nataanaamaamRuShTE hRudayamukurE nirmalaruci
prasannE niSSEShaM pratiphalati viSvaM girisutE ||84||
tava trastaM paadaatkisalayamaraNyaantaramagaat
paraM rEkhaaroopaM kamalamamumEvaaSritamabhoot |
jitaanaaM kaamaakShi dvitayamapi yuktaM paribhavE
vidESE vaasO vaa SaraNagamanaM vaa nijaripOH ||85||
gRuheetvaa yaathaarthyaM nigamavacasaaM dESikakRupaa-
kaTaakSharkajyOtiSSamitamamataabandhatamasaH |
yatantE kaamaakShi pratidivasamantardraDhayituM
tvadeeyaM paadaabjaM sukRutaparipaakEna sujanaaH ||86||
jaDaanaamapyamba smaraNasamayE tavaccaraNayOH
bhramanmanthakShmaabhRuddhumughumitasindhupratibhaTaaH |
prasannaaH kaamaakShi prasabhamadharaspandanakaraa
bhavanti svacCandaM prakRutiparipakkaa bhaNitayaH ||87||
vahannapyaSraantaM madhuraninadaM haMsakamasau
tamEvaadhaH kartuM kimiva yatatE kEligamanE |
bhavasyaivaanandaM vidadhadapi kaamaakShi caraNO
bhavatyaastaddrOhaM bhagavati kimEvaM vitanutE ||88||
yadatyantaM taamyatyalasagativaartaasvapi SivE
tadEtatkaamaakShi prakRutimRudulaM tE padayugam |
kireeTaiH saMghaTTaM kathamiva suraughasya sahatE
muneendraaNaamaastE manasi ca kathaM soociniSitE ||89||
manOrangE matkE vibudhajanasaMmOdajananee
saraagavyaasangaM sarasamRudusaMcaarasubhagaa |
manOgnyaa kaamaakShi prakaTayatu laasyaprakaraNaM
raNanmanjeeraa tE caraNayugaleenartakavadhooH ||90||
pariShkurvanmaataH paSupatikapardaM caraNaraaT
paraacaaM hRutpadmaM paramabhaNiteenaaM ca makuTam |
bhavaakhyE paathOdhau pariharatu kaamaakShi mamataa-
paraadheenatvaM mE parimuShitapaathOjamahimaa ||91||
prasoonaiH samparkaadamarataruNeekuntalabhavaiH
abheeShTaanaaM daanaadaniSamapi kaamaakShi namataam |
svasangaatkankEliprasavajanakatvEna ca SivE
tridhaa dhattE vaartaaM surabhiriti paadO girisutE ||92||
mahaamOhastEnavyatikarabhayaatpaalayati yO
vinikShiptaM svasminnijajanamanOratnamaniSam |
sa raagasyOdrEkaatsatatamapi kaamaakShi tarasaa
kimEvaM paadOsau kisalayaruciM cOrayati tE ||93||
sadaa svaaduMkaaraM viShayalahareeSaalikaNikaaM
samaasvaadya SraantaM hRudayaSukapOtaM janani mE |
kRupaajaalE phaalEkShaNamahiShi kaamaakShi rabhasaat
gRuheetvaa rundheethaarastava padayugeepanjarapuTE ||94||
dhunaanaM kaamaakShi smaraNalavamaatrENa jaDima-
jvaraprauDhiM gooDhasthiti nigamanaikunjakuharE |
alabhyaM sarvEShaaM katicana labhantE sukRutinaH
ciraadanviShyantastava caraNasiddhauShadhamidam ||95||
raNanmanjeeraabhyaaM lalitagamanaabhyaaM sukRutinaaM
manOvaastavyaabhyaaM mathitatimiraabhyaaM nakharucaa |
nidhEyaabhyaaM patyaa nijaSirasi kaamaakShi satataM
namastE paadaabhyaaM nalinamRudulaabhyaaM girisutE ||96||
suraagE raakEndupratinidhimukhE parvatasutE
ciraallabhyE bhaktyaa SamadhanajanaanaaM pariShadaa |
manObhRungO matkaH padakamalayugmE janani tE
prakaamaM kaamaakShi tripuraharavaamaakShi ramataam ||97||
SivE saMvidroopE SaSiSakalacooDapriyatamE
Sanairgatyaagatyaa jitasuravarEbhE girisutE |
yatantE santastE caraNanalinaalaanayugalE
sadaa baddhaM cittapramadakariyoothaM dRuDhataram ||98||
yaSaH sootE maatarmadhurakavitaaM pakShmalayatE
SriyaM dattE cittE kamapi paripaakaM prathayatE |
sataaM paaSagranthiM Sithilayati kiM kiM na kurutE
prapannE kaamaakShyaaH praNatiparipaaTee caraNayOH ||99||
maneeShaaM maahEndreeM kakubhamiva tE kaamapi daSaaM
pradhattE kaamaakShyaaScaraNataruNaadityakiraNaH |
yadeeyE samparkE dhRutarasamarandaa kavayataaM
pareepaakaM dhattE parimalavatee sooktinalinee ||100||
puraa maaraaraatiH puramajayadamba stavaSataiH
prasannaayaaM satyaaM tvayi tuhinaSailEndratanayE |
atastE kaamaakShi sphuratu tarasaa kaalasamayE
samaayaatE maatarmama manasi paadaabjayugalam ||101||
padadvandvaM mandaM gatiShu nivasantaM hRudi sataaM
giraamantE bhraantaM kRutakarahitaanaaM paribRuDhE |
janaanaamaanandaM janani janayantaM praNamataaM
tvadeeyaM kaamaakShi pratidinamahaM naumi vimalam ||102||
idaM yaH kaamaakShyaaScaraNanalinastOtraSatakaM
japEnnityaM bhaktyaa nikhilajagadaahlaadajanakam |
sa viSvEShaaM vandyaH sakalakavilOkaikatilakaH
ciraM bhuktvaa bhOgaanpariNamati cidroopakalayaa ||103||
|| iti paadaaravindaSatakaM sampoorNam ||