mOhaandhakaaranivahaM vinihantumeeDE
mookaatmanaamapi mahaakavitaavadaanyaan |
SreekaancidESaSiSireekRutijaagarookaan
EkaamranaathataruNeekaruNaavalOkaan ||1||

maatarjayanti mamataagrahamOkShaNaani
maahEndraneelaruciSikShaNadakShiNaani |
kaamaakShi kalpitajagattrayarakShaNaani
tvadveekShaNaani varadaanavicakShaNaani ||2||

aanangatantravidhidarSitakauSalaanaam
aanandamandaparighoorNitamantharaaNaam |
taaralyamamba tava taaDitakarNaseemnaaM
kaamaakShi khElati kaTaakShanireekShaNaanaam ||3||

kallOlitEna karuNaarasavEllitEna
kalmaaShitEna kamaneeyamRudusmitEna |
maamancitEna tava kiMcana kuncitEna
kaamaakShi tEna SiSireekuru veekShitEna ||4||

saahaayyakaM gatavatee muhurarjanasya
mandasmitasya paritOShitabheemacEtaaH |
kaamaakShi paaNDavacamooriva taavakeenaa
karNaantikaM calati hanta kaTaakShalakShmeeH ||5||

astaM kShaNaannayatu mE paritaapasooryam
aanandacandramasamaanayataaM prakaaSam |
kaalaandhakaarasuShumaaM kalayandigantE
kaamaakShi kOmalakaTaakShaniSaagamastE ||6||

taaTaankamauktikarucaankuradantakaantiH
kaaruNyahastipaSikhaamaNinaadhirooDhaH |
unmoolayatvaSubhapaadapamasmadeeyaM
kaamaakShi taavakakaTaakShamatangajEtandraH ||7||

CaayaabharaNE jagataaM paritaapahaaree
taaTankaratnamaNitallajapallavaSreeH |
kaaruNyanaama vikiranmakarandajaalaM
kaamaakShi raajati kaTaakShasuradrumastE ||8||

sooryaaSrayapraNayinee maNikuNDalaaMSu-
lauhityakOkanadakaananamaananeeyaa |
yaantee tava smaraharaananakaantisindhuM
kaamaakShi raajati kaTaakShakalindakanyaa ||9||

praapnOti yaM sukRutinaM tava pakShapaataat
kaamaakShi veekShaNavilaasakalaapurandhree |
sadyastamEva kila muktivadhoorvRuNeetE
tasmaannitaantamanayOridamaikamatyam ||10||

yaantee sadaiva marutaamanukoolabhaavaM
bhroovalliSakradhanurullasitaa rasaardraa |
kaamaakShi kautukatarangitaneelakaNThaa
kaadambineeva tava bhaati kaTaakShamaalaa ||11||

gangaambhasi smitamayE tapanaatmajEva
gangaadharOrasi navOtpalamaalikEva |
vaktraprabhaasarasi SaivalamaNDaleeva
kaamaakShi raajati kaTaakSharucicCaTaa tE ||12||

saMskaarataH kimapi kandalitaan rasagnya-
kEdaaraseemni sudhiyaamupabhOgayOgyaan |
kalyaaNasooktilahareekalamaaMkuraannaH
kaamaakShi pakShmalayatu tvadapaangamEghaH ||13||

caancalyamEva niyataM kalayanprakRutyaa
maalinyabhooH SratipathaakramajaagarookaH |
kaivalyamEva kimu kalpayatE nataanaaM
kaamaakShi citramapi tE karuNaakaTaakShaH ||14||

saMjeevanE janani cootaSileemukhasya
saMmOhanE SaSikiSOrakaSEkharasya |
saMstambhanE ca mamataagrahacEShTitasya
kaamaakShi veekShaNakalaa paramauShadhaM tE ||15||

neelOpi raagamadhikaM janayanpuraarEH
lOlOpi bhaktimadhikaaM dRuDhayannaraaNaam |
vakrOpi dEvi namataaM samataaM vitanvan
kaamaakShi nRutyatu mayi tvadapaangapaataH ||16||

kaamadruhO hRudayayantraNajaagarookaa
kaamaakShi cancaladRugancalamEkhalaa tE |
aaScaryamamba bhajataaM jhaTiti svakeeya-
samparka Eva vidhunOti samastabandhaan ||17||

kuNTheekarOtu vipadaM mama kuncitabhroo-
caapaancitaH SritavidEhabhavaanuraagaH |
rakShOpakaaramaniSaM janayanjagatyaaM
kaamaakShi raama iva tE karuNaakaTaakShaH ||18||

SreekaamakOTi SivalOcanaSOShitasya
SRungaarabeejavibhavasya punaHprarOhE |
prEmaambhasaardramaciraatpracurENa SankE
kEdaaramamba tava kEvaladRuShTipaatam ||19||

maahaatmyaSEvadhirasau tava durvilanghya-
saMsaaravindhyagirikuNThanakElicuncuH |
dhairyaambudhiM paSupatESculakeekarOti
kaamaakShi veekShaNavijRumbhaNakumbhajanmaa ||20||

peeyooShavarShavaSiSiraa sphuTadutpalaSree-
maitree nisargamadhuraa kRutataarakaaptiH |
kaamaakShi saMSritavatee vapuraShTamoortEH
jyOtsnaayatE bhagavati tvadapaangamaalaa ||21||

amba smarapratibhaTasya vapurmanOgnyam
ambhOjakaananamivaancitakaNTakaabham |
bhRungeeva cumbati sadaiva sapakShapaataa
kaamaakShi kOmalarucistvadapaangamaalaa ||22||

kESaprabhaapaTalaneelavitaanajaalE
kaamaakShi kuNDalamaNicCavideepaSObhE |
SankE kaTaakSharucirangatalE kRupaakhyaa
SailooShikaa naTati SaMkaravallabhE tE ||23||

atyantaSeetalamatandrayatu kShaNaardham
astOkavibhramamanangavilaasakandam |
alpasmitaadRutamapaarakRupaapravaaham
akShiprarOhamaciraanmayi kaamakOTi ||24||

mandaakSharaagataraleekRutipaaratantryaat
kaamaakShi mantharataraaM tvadapaangaDOlaam |
aaruhya mandamatikautukaSaali cakShuH
aanandamEti muhurardhaSaSaankamaulEH ||25||

traiyambakaM tripurasundari harmyabhoomi-
rangaM vihaarasarasee karuNaapravaahaH |
daasaaSca vaasavamukhaaH paripaalaneeyaM
kaamaakShi viSvamapi veekShaNabhoobhRutastE ||26||

vaageeSvaree sahacaree niyamEna lakShmeeH
bhroovallareevaSakaree bhuvanaani gEham |
roopaM trilOkanayanaamRutamamba tEShaaM
kaamaakShi yEShu tava veekShaNapaaratantree ||27||

maahESvaraM jhaTiti maanasameenamamba
kaamaakShi dhairyajaladhau nitaraaM nimagnam |
jaalEna SRunkhalayati tvadapaanganaamnaa
vistaaritEna viShamaayudhadaaSakOsau ||28||

unmathya bOdhakamalaakaaramamba jaaDya-
stambEramaM mama manOvipinE bhramantam |
kuNTheekuruShva tarasaa kuTilaagraseemnaa
kaamaakShi taavakakaTaakShamahaankuSEna ||29||

udvEllitastabakitairlalitairvilaasaiH
utthaaya dEvi tava gaaDhakaTaakShakunjaat |
dooraM palaayayatu mOhamRugeekulaM mE
kaamaakShi stavaramanugrahakEsareendraH ||30||

snEhaadRutaaM vidalitOtpalakanticOraaM
jEtaaramEva jagadeeSvari jEtukaamaH |
maanOddhatO makarakEturasau dhuneetE
kaamaakShi taavakakaTaakShakRupaaNavalleem ||31||

SrauteeM vrajannapi sadaa saraNiM muneenaaM
kaamaakShi santatamapi smRutimaargagaamee |
kauTilyamamba kathamasthirataaM ca dhattE
cauryaM ca pankajarucaaM tvadapaangapaataH ||32||

nityaM SrEtuH paricitau yatamaanamEva
neelOtpalaM nijasameepanivaasalOlam |
preetyaiva paaThayati veekShaNadESikEndraH
kaamaakShee kintu tava kaalimasampradaayam ||33||

bhraantvaa muhuH stabakitasmitaphEnaraaSau
kaamaakShi vaktrarucisaMcayavaariraaSau |
aanandati tripuramardananEtralakShmeeH
aalambya dEvi tava mandamapaangasEtum ||34||

Syaamaa tava tripurasundari lOcanaSreeH
kaamaakShi kandalitamEdurataarakaantiH |
jyOtsnaavatee smitarucaapi kathaM tanOti
spardhaamahO kuvalayaiSca tathaa cakOraiH ||35||

kaalaanjanaM ca tava dEvi nireekShaNaM ca
kaamaakShi saamyasaraNiM samupaiti kaantyaa |
niSSEShanEtrasulabhaM jagateeShu poorva-
manyattrinEtrasulabhaM tuhinaadrikanyE ||36||

dhoomaankurO makarakEtanapaavakasya
kaamaakShi nEtrarucineelimacaaturee tE |
atyantamadbhutamidaM nayanatrayasya
harShOdayaM janayatE haruNaankamaulEH ||37||

aarabhbhalESasamayE tava veekShaNassa
kaamaakShi mookamapi veekShaNamaatranamram |
sarvagnyataa sakalalOkasamakShamEva
keertisvayaMvaraNamaalyavatee vRuNeetE ||38||

kaalaambuvaaha uva tE paritaapahaaree
kaamaakShi puShkaramadhaHkurutE kaTaakhxShaH |
poorvaH paraM kShaNarucaa samupaiti maitree-
manyastu sa.tataruciM prakaTeekarOti ||39||

sookShmEpi durgamatarEpi guruprasaada-
saahaayyakEna vicarannapavargamaargE |
saMsaarapankanicayE na patatyamooM tE
kaamaakShi gaaDhamavalambya kaTaakShayaShTim ||40||

kaamaakShi santatamasau harineelaratna-
stambhE kaTaakSharucipunjamayE bhavatyaaH |
baddhOpi bhaktinigalairmama cittahastee
stambhaM ca bandhamapi muncati hanta citram ||41||

kaamaakShi kaaShNaryamapi santatamanjanaM ca
bibhrannisargataralOpi bhavatkaTaakShaH |
vaimalyamanvahamananjanataa ca bhooyaH
sthairyaM ca bhaktahRudayaaya kathaM dadaati ||42||

mandasmitastabakitaM maNikuNDalaaMSu-
stOmapravaalaruciraM SiSireekRutaaSam |
kaamaakShi raajati kaTaakSharucEH kadambam
udyaanamamba karuNaahariNEkShaNaayaaH ||43||

kaamaakShi taavakakaTaakShamahEndraneela-
siMhaasanaM SritavatO makaradhvajasya |
saamraajyamangalavidhau muNikuNDalaSreeH
neeraajanOtsavatarangitadeepamaalaa ||44||

maataH kShaNaM snapaya maaM tava veekShitEna
mandaakShitEna sujanairaparOkShitEna |
kaamaakShi karmatimirOtkarabhaaskarENa
SrEyaskarENa madhupadyutitaskarENa ||45||

prEmaapagaapayasi majjanamaaracayya
yuktaH smitaaMSukRutabhasmavilEpanEna |
kaamaakShi kuNDalamaNidyutibhirjaTaalaH
SreekaNThamEva bhajatE tava dRuShTipaataH ||46||

kaivalyadaaya karuNaarasakiMkaraaya
kaamaakShi kandalitavibhramaSaMkaraaya |
aalOkanaaya tava bhaktaSivaMkaraaya
maatarnamOstu paratantritaSaMkaraaya ||47||

saamraajyamangalavidhau makaradhvajasya
lOlaalakaalikRutatOraNamaalyaSObhE |
kaamESvari pracaladutpalavaijayantee-
caaturyamEti tava cancaladRuShTipaataH ||48||

maargENa manjukacakaantitamOvRutEna
mandaayamaanagamanaa madanaaturaasau |
kaamaakShi dRuShTirayatE tava SaMkaraaya
saMkEtabhoomimaciraadabhisaarikEva ||49||

vreeDanuvRuttiramaNeekRutasaahacaryaa
SaivaalitaaM galarucaa SaSiSEkharasya |
kaamaakShi kaantisaraseeM tvadapaangalakShmeeH
mandaM samaaSrayati majjanakhElanaaya ||50||

kaaShaayamaMSukamiva prakaTaM dadhaanO
maaNikyakuNDalaruciM mamataavirOdhee |
Srutyantaseemani rataH sutaraaM cakaasti
kaamaakShi taavakakaTaakShayateeSvarOsau ||51||

paaShaaNa Eva harineelamaNirdinEShu
pramlanataaM kuvalayaM prakaTeekarOti |
naumittikO jaladamEcakimaa tatastE
kaamaakShi SoonyamupamanamapaangalakShmyaaH ||52||

SRungaaravibhramavatee sutaraaM salajjaa
naasaagramauktikarucaa kRutamandahaasaa |
Syaamaa kaTaakShasuShamaa tava yuktamEtat
kaamaakShi cumbati digambaravaktrabimbam ||53||

neelOtpalEna madhupEna ca dRuShTipaataH
kaamaakShi tulya iti tE kathamaamananti |
SaityEna nindayati yadanvahamindupaadaan
paathOruhENa yadasau kalahaayatE ca ||54||

OShThaprabhaapaTalavidrumamudritE tE
bhroovalliveecisubhagE mukhakaantisindhau |
kaamaakShi vaaribharapooraNalambamaana-
kaalaambuvaahasaraNiM labhatE kaTaakShaH ||55||

mandasmitairdhavalitaa maNikuNDalaaMSu-
samparkalOhitarucistvadapaangadhaaraa |
kaamaakShi mallikusumairnavapallavaiSca
neelOtpalaiSca racitEva vibhaati maalaa ||56||

kaamaakShi SeetalakRupaarasanirjharaambhaH-
samparkapakShmalarucistvadapaangamaalaa |
gObhiH sadaa puraripOrabhilaShyamaaNaa
doorvaakadambakaviDambanamaatanOti ||57||

hRutpankajaM mama vikaasayatu pramuShNa-
nnullaasamutpalarucEstamasaaM nirOddhaa |
dOShaanuShangajaDataaM jagataaM dhunaanaH
kaamaakShi veekShaNavilaasadinOdayastE ||58||

cakShurvimOhayati candravibhooShaNasya
kaamaakShi taavakakaTaakShatamaHprarOhaH |
pratyanmukhaM tu nayanaM stimitaM muneenaaM
praakaaSyamEva nayateeti paraM vicitram ||59||

kaamaakShi veekShaNarucaa yudhi nirjitaM tE
neelOtpalaM niravaSEShagataabhimaanam |
aagatya tatparisaraM SravaNavataMsa-
vyOjEna noonamabhayaarthanamaatanOti ||60||

aaScaryamamba madaanaabhyudayaavalambaH
kaamaakShi cancalanireekShaNavibhramastE |
dhairyaM vidhooya tanutE hRudi raagabandhaM
SambhOstadEva vipareetatayaa muneenaam ||61||

jantOH sakRutpraNamatO jagadeeDyataaM ca
tEjaasvitaaM ca niSitaaM ca matiM sabhaayaam |
kaamaakShi maakShikajhareemiva vaikhareeM ca
lakShmeeM ca pakShmalayati kShaNaveekShaNaM tE ||62||

kaadambinee kimayatE na jalaanuShangaM
bhRungaavalee kimurareekurutE na padmam |
kiM vaa kalindatanayaa sahatE na bhangaM
kaamaakShi niScayapadaM na tavaakShilakShmeeH ||63||

kaakOlapaavakatRuNeekaraNEpi dakShaH
kaamaakShi baalakasudhaakaraSEkharasya |
atyantaSeetalatamOpyanupaarataM tE
cittaM vimOhayati citramayaM kaTaakShaH ||64||

kaarpaNyapooraparivardhitamamba mOha-
kandOdgataM bhavamayaM viShapaadapaM mE |
tungaM Cinattu tuhinaadrisutE bhavatyaaH
kaanceepurESvari kaTaakShakuThaaradhaaraa ||65||

kaamaakShi ghOrabhavarOgacikitsanaartha-
mabhyarthya dESikakaTaakShabhiShakprasaadaat |
tatraapi dEvi labhatE sukRutee kadaaci-
danyasya durlabhamapaangamahauShadhaM tE ||66||

kaamaakShi dESikakRupaaMkuramaaSrayantO
naanaatapOniyamanaaSitapaaSabandhaaH |
vaasaalayaM tava kaTaakShamamuM mahaantO
labdhvaa sukhaM samaadhiyO vicaranti lOkE ||67||

saakootasaMlapitasambhRutamugdhahaasaM
vreeDaanuraagasahacaari vilOkanaM tE |
kaamaakShi kaamaparipanthini maaraveera-
saamraajyavibhramadaSaaM saphaleekarOti ||68||

kaamaakShi vibhramabalaikanidhirvidhaaya
bhroovallicaapakuTileekRutimEva citram |
svaadheenataaM tava ninaaya SaSaankamaulE-
rangaardharaajyasukhalaabhamapaangaveeraH ||69||

kaamaaMkuraikanilayastava dRuShTipaataH
kaamaakShi bhaktamanasaaM pradadaatu kaamaan |
raagaanvitaH svayamapi prakaTeekarOti
vairaagyamEva kathamESha mahaamuneenaam ||70||

kaalaambuvaahanivahaiH kalahaayatE tE
kaamaakShi kaalimamadEna sadaa kaTaakShaH |
citraM tathaapi nitaraamamumEva dRuShTvaa
sOtkaNTha Eva ramatE kila neelakaNThaH ||71||

kaamaakShi manmatharipuM prati maarataapa-
mOhaandhakaarajaladaagamanEna nRutyan |
duShkarmakancukikulaM kabaleekarOtu
vyaamiSramEcakarucistvadapaangakEkee ||72||

kaamaakShi manmatharipOravalOkanEShu
kaantaM payOjamiva taavakamakShipaatam |
prEmaagamO divasavadvikaceekarOti
lajjaabharO rajanivanmukuleekarOti ||73||

mookO virincati paraM puruShaH kuroopaH
kandarpati tridaSaraajati kimpacaanaH |
kaamaakShi kEvalamupakramakaala Eva
leelaatarangitakaTaakSharucaH kShaNaM tE ||74||

neelaalakaa madhukaranti manOgnyanaasaa-
muktaarucaH prakaTakandabisaankuranti |
kaaruNyamamba makarandati kaamakOTi
manyE tataH kamalamEva vilOcanaM tE ||75||

aakaaMkShyamaaNaphaladaanavicakShaNaayaaH |
kaamaakShi taavakakaTaakShakakaamadhEnOH |
samparka Eva kathamamba vimuktapaaSa-
bandhaaH sphuTaM tanubhRutaH paSutaaM tyajanti ||76||

saMsaaragharmaparitaapajuShaaM naraaNaaM
kaamaakShi SeetalataraaNi tavEkShitaani |
candraatapanti ghanacandanakardamanti
muktaaguNanti himavaariniShEcananti ||77||

prEmaamburaaSisatatasnapitaani citraM
kaamaakShi taavakakaTaakShanireekShaNaani |
sandhukShayanti muhurindhanaraaSireetyaa
maaradruhO manasi manmathacitrabhaanum ||78||

kaalaanjanapratibhaTaM kamaneeyakaantyaa
kandarpatantrakalayaa kalitaanubhaavam |
kaanceevihaararasikE kaluShaarticOraM
kallOlayasva mayi tE karuNaakaTaakSham ||79||

kraantEna manmathadEna vimOhyamaana-
svaantEna cootatarumoolagatasya puMsaH |
kaantEna kiMcidavalOkaya lOcanasya
praantEna maaM janani kaancipureevibhooShE ||80||

kaamaakShi kOpi sujanaastvadapaangasaMgE
kaNThEna kandalitakaalimasampradaayaaH |
uttaMsakalpitacakOrakuTumbapOShaa
naktandivasaprasavabhoonayanaa bhavanti ||81||

neelOtpalaprasavakaantinirdaSanEna
kaaruNyavibhramajuShaa tava veekShaNEna |
kaamaakShi karmajaladhEH kalaSeesutEna
paaSatrayaadvayamamee parimOcaneeyaaH ||82||

atyantacancalamakRutrimamanjanaM kiM
jhaMkaarabhangirahitaa kimu bhRungamaalaa |
dhoomaankuraH kimu hutaaSanasaMgaheenaH
kaamaakShi nEtrarucineelimakandalee tE ||83||

kaamaakShi nityamayamanjalirastu mukti-
beejaaya vibhramamadOdayaghoorNitaaya |
kandarpadarpapunarudbhavasiddhidaaya
kalyaaNadaaya tava dEvi dRugancalaaya ||84||

darpaankurO makarakEtanavibhramaaNaaM
nindaankurO vidalitOtpalacaatureeNaam |
deepaankurO bhavatamisrakadambakaanaaM
kaamaakShi paalayatu maaM tvadapaangapaataH ||85||

kaivalyadivyamaNirOhaNaparvatEbhyaH
kaaruNyanirjharapayaHkRutamanjanEbhyaH |
kaamaakShi kiMkaritaSankaramaanasEbhya-
stEbhyO namOstu tava veekShaNavibhramEbhyaH ||86||

alpeeya Eva navamutpalamamba heenaa
meenasya vaa saraNiramburuhaaM ca kiM vaa |
doorE mRugeedRugasamanjasamanjanaM ca
kaamaakShi veekShaNarucau tava tarkayaamaH ||87||

miSreebhavadgaralapankilaSankarOras-
seemaangaNE kimapi rinkhaNamaadadhaanaH |
hElaavadhootalalitaSravaNOtpalOsau
kaamaakShi baala iva raajati tE kaTaakShaH ||88||

prauDhikarOti viduShaaM navasooktidhaaTee-
cootaaTaveeShu budhakOkilalaalyamaanam |
maadhveerasaM parimalaM ca nirargalaM tE
kaamaakShi veekShaNavilaasavasantalakShmeeH ||89||

koolaMkaShaM vitanutE karuNaambuvarShee
saarasvataM sukRutinaH sulabhaM pravaaham |
tucCeekarOti yamunaambutarangabhangeeM
kaamaakShi kiM tava kaTaakShamahaambuvaahaH ||90||

jagarti dEvi karuNaaSukasundaree tE
taaTankaratnarucidaaDimakhaNDaSONE |
kaamaakShi nirbharakaTaakShamareecipunja-
maahEndraneelamaNipanjaramadhyabhaagE ||91||

kaamaakShi satkuvalayasya sagOtrabhaavaa-
daakraamati Srutimasau tava dRuShTipaataH |
kiMca sphuTaM kuTilataaM prakaTeekarOti
bhroovallareeparicitasya phalaM kimEtat ||92||

EShaa tavaakShisuShamaa viShamaayudhasya
naaraacavarShalaharee nagaraajakanyE |
SaMkE karOti Satadhaa hRudi dhairyamudraaM
SreekaamakOTi yadasau SiSiraaMSumaulEH ||93||

baaNEna puShpadhanuShaH parikalpyamaana-
traaNEna bhaktamanasaaM karuNaakarENa |
kONEna kOmaladRuSastava kaamakOTi
SONEna SOShaya SivE mama SOkasindhum ||94||

maaradruhaa mukuTaseemani laalyamaanE
mandaakineepayasi tE kuTilaM cariShNuH |
kaamaakShi kOparabhasaadvalamaanameena-
sandEhamankurayati kShaNamakShipaataH ||95||

kaamaakShi saMvalitamauktikakuNDalaaMSu-
cancatsitaSravaNacaamaracaatureekaH |
stambhE nirantaramapaangamayE bhavatyaa
baddhaScakaasti makaradhvajamattahastee ||96||

yaavatkaTaakSharajaneesamayaagamastE
kaamaakShi taavadaciraannamataaM naraaNaam |
aavirbhavatyamRutadeedhitibimbamamba
saMvinmayaM hRudayapoorvagireendraSRungE ||97||

kaamaakShi kalpaviTapeeva bhavatkaTaakShO
ditsuH samastavibhavaM namataaM naraaNaam |
bhRungasya neelanalinasya ca kaantisampa-
tsarvasvamEva harateeti paraM vicitram ||98||

atyantaSeetalamanargalakarmapaaka-
kaakOlahaari sulabhaM sumanObhirEtat |
peeyooShamEva tava veekShaNamamba kintu
kaamaakShi neelamidamityayamEva bhEdaH ||99||

agnyaatabhaktirasamaprasaradvivEka-
matyantagarvamanadheetasamastaSaastram |
apraaptasatyamasameepagataM ca muktEH
kaamaakShi naiva tava spRuhayati dRuShTipaataH ||100||

(kaamaakShi maamavatu tE karuNaakaTaakShaH)
paatEna lOcanarucEstava kaamakOTi
pOtEna patakapayOdhibhayaaturaaNaam |
pootEna tEna navakaancanakuNDalaaMSu-
veetEna Seetalaya bhoodharakanyakE maam ||101||

|| iti kaTaakShaSatakaM sampoorNam ||